Allir þeir sem eiga lögheimili á Borgarfirði eystra fá ókeypis miða á tónlistarhátíðina Bræðsluna á laugardagskvöld. Þetta gera forsvarsmenn Bræðslunnar til að sýna heimamönnum á Borgarfirði þakklæti sitt fyrir góðan stuðning sem þeir hafa sýnt hátíðinni í gegnum árin. Bræðslan er nú haldin í sjötta sinn og meðal tónlistarmanna sem þar hafa komið fram eru: Damien Rice, Emiliana Torrini, Belle & Sebastian, Þursaflokkurinn, Eyvör Pálsdóttir, Lay Low og Megas. Að þessu sinni koma fram hljómsveitirnar Dikta, 200.000 naglbítar, enska sveitin Fanfarlo, auk systkinanna KK og Ellenar.